مفتى الحكومه

يبدو ان شيخ الازهر محمد سيد طنطاوى قد اصبح جزء من النظام الحاكم وتحول منصبه من منصب دينى الى منصب سياسى فمواقفه دائما مؤيده للحكومه وحليفتها امريكا فعندما التقى ببعض الطلاب وسالوه عن رايه فى المحاكمه الدوليه لعمر البشير قال متدخلونيش فى السياسه وعندما سالوه عن ايران وفيلم اعدام فرعون قال بالنص(اذا لم تحرق ايران فيلم اعدام فرعون فهذا فراق بيننا وبينهم حتى الممات وابعاد الى نهايه البعد) والسؤال الان هل شاهد شيخ الازهر الفيلم ام انه يتحدث بناء على كلام صحافه الحكومه التى تريد ان نقطع علاقتنا مع ايران ارضاء لامريكا وهو جزء من مخطط امريكى لعزله ايران لمحاوله امتلاكها اقوى واحدث سلاح فى العالم وهو السلاح النووى وان هذا الفيلم اتخذوه حجه لقطع العلاقات مع ان هذا الفيلم ليس من انتاج الحكومه الايرانيه وبعدين معظم افلام امريكا مليئه بالاستهزاء بالعرب والسخريه من المسلمين ومع ذلك لم يدعو شيخ الازهر الى قطع العلاقات معهم اه صحيح ازاى هيدعو لقطع العلاقات معهم واحنا بنحاول ارضائهم بشتى الطرق وبننفذ مخططهم وهو عزله ايران وطب ليه مطلبش ان احنا نقطع علاقتنا مع اسرائيل اولى فهى التى تقتل الاف المسلمين فى فلسطين وشردت الاف الاسر ( ولتجدن اشد الناس عداوه للمسلمين اليهود) ده حتى امتنع عن صدار فتوى بشان تصدير الغز الطبيعى لاسرائيل الم اقل لكم انه اصبح جزء من النظام الحاكم عايزين دليل تانى هو مش قال فى مساله عمر البشير متدخلونيش فى السياسه طب المطالبه بقطع العلاقات مع ايران مش سياسه فشيخ الازهر اصبح منصبه منصب سياسى من الدرجه الاولى واصبح جزء من الحكومه التى تناقض نفسها مثل الرئيس الحاكم عندما تسمعه يخطب تبقى الدمعه هتنزل من عينك تسمعه كان قلبه بيتقطع على محدودالدخل يقولك انه مهتم بمحدودى الدخل انه ينحاز لمحدودى الدخل انه يعمل لمصلحه محدودى الدخل دون ان يحدد لنا من هم محدودى الدخل الذين يقصدهم ويعمل لمصلحتهم هل هم احمد عز ونجيب ساويرس وممدوح اسماعيل وهانى سرور وحسين سالم وامثالهم ام الفقراء الذين يكتون بنار الاسعار ومعارك طوابير الخبز وازمه بنزين 80 وقانون المرور الجديد الذى لايطبق الى على الفقراء ومع ذلك يقولون ان معدل التنميه يرتفع والاستثمار بيزيد
وعجبى 0000

ادله ادانه ممدوح اسماعيل وضياع الامل

هل صارت ارواحنا رخيصه الى هذا الحد فقد تم الحكم ببراءه من قتل اكثر من 1030 شخص فى مقبره جماعيه فى قاع البحر الاحمر الذى اشتد احمرارا بدماء الضحايا مع العلم ان ادله الادانه واضحه وصريحه ولكن بدء العمل سريعا ليخرج القاتل بريئا ففى البدايه تم تحويل القضيه بواسطه النائب العام السابق الى محكمه جنح مع العلم ان قتل الحيوان يعتبر جنايه ولكن من الواضح ان ارواحنا عند الحكومه ارخص من الحيوان بكثير وتم اعتبار ممدوح اسماعيلب المتهم الخامس فى القضيه مع انه المتهم الاول بصفته رئيس مجلس الاداره والمسئول الاول والاخير عن كل شىء فى الشركه وقصه العباره بدات حينما تم شرائها من موانىء اوروبا بهدف تخريدها بعد انتهاء عمرها الافتراضى وقام بطلائها وبناء طوابق اضافيه لتستوعب عددا اكبر من الركاب ليكون الربح اكثر وكان العدد المصرح به هو 1187 راكب الا انه بفضل
نفوذه نجح فى استخراج تصريح بمضاعفه عدد الركاب الى 2890 راكب وكانت المسافه المحدده لسير السفينه هى 20 ميلا فى حين ان اقل رحله لهذه السفينه لاتقل عن 63 ميلا وبفضل نفوذه ايضا نجح فى احتكار رحلات الحج والعمره وكان ممدوح اسماعيل يهمل فى صيانه العباره لانها تكلفه مبالغ باهظه فكانت طفايات الحريق غير صالحه والصندوق الاسود معطل وبلاعات تصريف المياه مسدوده وقوارب النجاه منتهيه الصلاحيه منذ خمس سنوات بشهاده لجنه التفتيش التى اثبتت ان 63 من اصل 88 قارب منتهيه الصلاحيه ولا تحتوى على الطلقات الضوئيه التى تطلق تلقائيا للاستغاثه ورغم كل ذلك حصل القاتل على البراءه الهذا الحد اصبحنا عبيدا للحزب الوطنى ورجاله الذين هم فوق القانون وفى لحظه النطق بالحكم وقع على كالصاعقه فقد ضاع اخر امل يتشبث به الضعفاء الذى هو القضاء ( قضاء مصر الشامخ ) فقد طاله الفساد واصبحت النخبه الحاكمه تتحكم فيه فقد تم تبرئه ممدوح اسماعيل ومن قبله هانى سرور وتم الحكم على المفكر المصرى الوطنى سعد الدين ابراهيم بالسجن سنتين فباى امل يتشبث الضعفاء اذن حقا انه قمه الفساد انه مستقبل اسود ليس لنا الان الا الله

وصيه الرئيس مبارك

إلتفت الأسرة حول فراش الزعيم وهو يلفظ أنفاسه الأخيرة.. قال الزعيم بصوت ضعيف ولكنه حازم فى نفس الوقت
حسنى: كلكم موجودين
سوزان: أيوه ياحسنى ... أنا جنبك أهه ... وأدى جمال وعلاء ... قمرين دول ولا عينين
حسنى: طب إسمعوا اللى حقوله كويس
جمال: سامعينك يابابا ... إتكلم
حسنى: مصر دى كنز ياولاد ... إمكسوا فيها بإيديكم وسنانكم ... بنسرق فيهابقالنا سنين وسنين ولسه بتدينا
علاء: هيا دى البركة اللى بيقولوا عليها يابابا
حسنى: أيوه يابنى ..... ربنا يبارك لكم ولعيالكم فيها ... ودلوقتى إسمعونى
علاء: إنته على الهوى يابابا ... إتكلم
حسنى: أنا مش مديون لحد ياولاد ... يعنى أى واحد يصيع عليكم ويقول لكم أبوكم كان مستلف منى فلوس تفوا فى وشه على طول
علاء: إطمن يابابا .... حرامى على حرامى ما يلعبش
حسنى: أنا سيبت لكم ياولاد اللى يكفيكم إنتوا وعيالكم وعيال عيالكم ويفيض .......فلوس متلتلة متتعدش ..... مش حقول لكم حافظوا عليها وبس ... لآلآلآلا زودوها كمان وكمان لجل ما روحى ترتاح وأنا فى تربتى
جمال: هيا الفلوس اللى إنته عملتها يابابا دى بتسميها فلوس .... شفنى أنا وعلاء حنعمل إيه .... ولا صحيح حتشوفنا إزاى .... عموماً ما تقلقش
حسنى: ودلوقتى إسمعوا وصيتى ..... الحكم لأولاد مبارك ......... لازم أول ما جمال يحلف اليمين تغيروا إسم مصر وترجعوه زى ما كان زمان أيام الملك فاروق والملكة نازلى (المملكة المصرية)
جمال: مفهوم يابابا ... خش فى اللى بعده
حسنى: الجيش والشرطة والأزهر ... أوعوا واحد من التلاته دول يخرج عن طوعكم أبداً
علاء: مفهوم برده ... اللى بعده .... ياساتر ده إنته مل
لسوزان: عيب ياعلاء لما تكلم أبوك كده
علاء: بهزر ياماما
حسنى: الهرم لأم العيال ... ليكى ياسوزان بعد ما خدمتينى بتفانى وإخلاص طول السنين دى
سوزان: هرم ! .... هيا دى آخرة صبرى ! ...... وده يسوى كام ده
علاء وهو يمسك بالألة الحاسبة : يسوى كتير ياماما ... لو تحبى أتصرف لك فيه ممكن يعمل معاكى مبلغ كويس
سوزان: مش حرضى باأقل من التلات أهرامات وأبو الهول
حسنى: مش خسارة فيكى ياغالية .... أثار النوبة لعلاء .... والأقصر لجمال .........ودلوقتى نيجى للميه .... الساحل الشمالى لعلاء والبحر الأحمر لجمال وقناة السويس تخصصوا دخلها صدقة جارية على روحى
سوزان: إنته أكيد مخبول ... مليار ونص دولار صدقة جارية على روحك
جمال: ما تاخديش على كلامه ياماما .... ده يبقى كتير لو طلعنا 100 ولا 200 جنيه على روحه للفقرا
علاء وهو يمسك بالألة الحاسبة: ممكن نطلع لحد ألف جنيه ياجمال ... السيولة تسمح
حسنى: أوعوا تفرطوا فى حبيب العادلى من بعدى ياولاد .... حبيب قلبه ميت وإيده طرشه ....... وهوه ده اللى ينفع مع الغجر اللى هنا
جمال: بس ما بيعجبنيش شنبه يابابا
حسنى: إنته مالك ومال أم شنبه ...... إحنا بنشترى مجرم
جمال: أعاهدك يابابا إنى حخليه معايا ومش حفرط فيه أبداً
حسنى: الشيخ طنطاوى ياولاد راجل بركة ..... يمين يمين شمال شمال ......... أوعوا تفرطوا فيه ..... بس ما تخلوهوش يصلى عليا لأني بصراحة مش متأكد إن كان ربنا حيقبل منه ولا لأ
علاء: ولا يهمك يابابا .... حخلى أنكل كمال الشاذلى يصلى عليك
حسنى: والله لو عملتها ياعلاء لكون متبرى منك إلى يوم الدين
علاء: بهزر معاك يابابا ..... أنكل كمال مش حافظ الفاتحة
حسنى: المشير طنطاوى ياولاد ...... مش حوصيكم عليه ..... الراجل ده عامل زى الست المستحية .... حاطط وشه فى الأرض على طول وعمره ما استجرى يرفع عينه فيا ... وفى نفس الوقت ماسك الجيش بإيد من حديد
سوزان: هوه فعلاً خجول وكل ما يشوفنى ما يقوليش غير ياست هانم .... إبقى خليه معاك ياجمال
جمال: حاضر ياماما
حسنى: عايز جنازتى ياولاد الناس تحكى وتتحاكى عنها ....... هاتوا المخرج الإيطالى ده اللى إسمه مكافيللى يصورها
علاء وهو يمسك بالألة الحاسبة: هوه حيكلفنا كتير ... لكن ممكن فى الأخر نلم مبلغ معقول لو خلينا شركة أجنبية تحتكر حق توزيع الفيديو فى أوروبا وأمريكا
حسنى: عايز أحلى مدفع يشيل النعش ياولاد
جمال: مدفع رشاش
سوزان: الهزار مش فى الحاجات دى ياجمال
جمال: آسف ياماما
حسنى: عايز أدفن فى شرم الشيخ ياولاد جنب أولمرت وشارون
علاء: بلاش كفر مصيلحة يعنى
حسنى: لأ كلها براغيت ياعلاء .... وإسم شرم الشيخ كمان أشيك بكتير
الموضوع مقتبس من موقع( حزب العمل)