قصيده الرئيس مبارك فى حب مصر

يا شعبي حبيبي يا شعبي

حبيبي يا روحي يا بيبي

يا حاطك في جيبي يا ابن الحلال

يا شعبي يا شاطر يا جابر خواطر يا ساكن مقابر وصابر

يا واكل سمومك يا بايع هدومك يا حامل همومك و شايل جبال

يا شعبي اللي نايم وسارح وهايم وفي الفقر عايم وحاله دا حال

أحبك محشش مفرفش مطنش ودايخ مدروخ وآخر انسطال

أحبـك مكبـر دماغـك مخـدر ممشـّي امورك كدة باتكال

وأحب اللي ينصب وأحب اللي يكذب وأحب اللي ينهب ويسرق تلال

وأحب اللي شايف وعارف وخايف وبــالع لســانه وكاتم ما قال

وأحب اللي قافل عيونه المغفل وأحب البهايم وأحب البغال

اللي راضي وأحب اللي فاضي وأحب اللي عايز يربي العيال

وأحب اللي يائس واحب اللي بائس و احب اللي محبط وشايف

واحبك تســـافر وتبعد تهاجــر وتبعت فلوسك دولار أو ريال

واحبك تطبـّل تهـلل تهبـّـل عشان ماتش كورة وفيلم ومقال

واحبك تأيــّد تعضّـد تمجّــد توافق تنافق وتلحس نعال

تحضّر نشـادر تجـمّع كوادر تلمـّع تقمـّع تظبـّط مجـال

لكن لـو تفكـّر تخـطط تقـرر تشغللي مخك وتفتح جدال

وتبدأ تشاكل وتعمل مشاكل وتنكش مسائل وتسأل سؤال

وعايز تنور وعايز

وتعمللي روحك مفرد رجال

(طبعا القصيده دى مش انا اللى مالفها بس عجبتنى قولت احفظها عالمدونه)

حاكم فاسد وحكومه فاشله ومستقبل اسود

رئيس عمره يناهز ال ثمانون عاما (انتهى عمره الافتراضى) يحكم مصر بمقتضى قانون الطوارئ ويحكم السيطره الامنيه على الشعب وزياده اعداد رجال الامن المركزى حتى انك تشعر ان هناك ( جندى امن مركزى لكل مواطن ) وهذا لتوطيد حكمه لانه يعلم انه غير مرغوب فيه شعبيا ولضمان توريث ابنه ورغم ذلك اختار رجال حكومته بعنايه شديده فمثلا رئيس الوزراء احمد نظيف ولا نعلم اختاره لماذا هل على اساس كفائته؟ ام على اساس اسمه؟ واذا كان على اساس اسمه فهل لينظف البلاد من الرشوه والفساد والاحتكار والتلوث المنتشر فى كل مكان ؟ ام لينظف بنوك وخزائن الدوله وينقل ثرواتها لحسابه وحساب رجال الحزب الحاكم فى بنوك سويسرا؟ اما وزير الماليه فهو بطرس غالى ( هو غالى والشعب ابن ستين فى سبعين) اما رئيس مجلس الشعب فهو فتحى سرور ليدخل السرور على رجال السلطه الحاكمه فيدير جلسات مجلس الشعب لمصلحه الحزب الحاكم اما ابن الناظر ( جمال مبارك) تخيل حال البلد حينما يكون الرئيس اسمه جمال وابيه اسمه مبارك اكيد طبعا البلد هتكون جميله زى رئيسها وربنا يباركلهم فيها وفى فلوسها ومواردها (واحنا نشحت مش مهم) اما صديقه ابن عز فساعتها ممكن يبقى ئيس وزراء او وزير عالاقل وهيخلى البلد والناس تعيش فى عز والله ربنا يستر عالبلد دى حينما يحكمها جمال وعز والمحتكرين وينتشر الفساد والرشوه اكثر وهناك حكمه قالها الدكتور جابر عصفور ينبغى ان نرددها دائما وهى ( الحكام لايهدون الديمقراطيه الى شعوبهم ولكن الشعوب تنتزعها انتزاعا)

انجازات الرئيس مبارك

27 سنه طوارئ و 27 سنه احتكار للسلطه
ظهور شهداء الخبز للمره الاولى فى مصر
زياده اعداد المعتقلين ووجود ظاهره تعذيب المواطنين الابرياء داخل اقسام الشرطه
غلاء فاحش فى الاسعار وانخفاض الدخل القومى وانهيار الطبقه المتوسطه
انتعاش حركه الاحتكار وخاصه الحديد لصالح ابن عز اقتداء برئيس الجمهوريه فى احتكار السلطه
زياده عدد السكان وفشل مشروع تنظيم الاسره برغم المليارات التى صرفت عليه
فشل مشروع توشكى وبيعه للمستثمرين
تصدير الغاز الطبيعى المصرى لاسرائيل بارخص من سعر استخراجه
موافقه الحكومه على مشروع اجريوم الملوث للبيئه
هروب ممدوح اسماعيل نائب الحزب الوظنى للندن صاحب عباره الموت (السلام98)
الحكم ببراءه هانى سرور نائب الوطنى من قضيه اكياس الدم الفاسده ولا احد يعلم ملابسات القضيه
انتشار حركه القمع وتقييد الحريات وانتهاك حقوق الانسان
انتشار حركه الاضرابات والاعتصامات لجميع فئات الشعب
تزوير الانتخابات من مجلس شعب لمحلس محلى لاستفتاءات
فشل الوزراء فى تحقيق المطالب الاساسيه للشعب المصرى
حقا هذه انجازات الرئيس مبارك وتتوالى الانجازات عشت لمصر يا مبارك ونتحرق احنا مش مهم

فساد الوزراء بالارقام

للوزراء الحق فيما يفعلونه مع الشعب المصرى من غلاء اسعار واحتكار وظلم وفساد واعتقال وسرقه ونهب ورشوه وفساد وكل مايحدث فى هذا البلد واذا عرف السبب بطل العجب
1-سلبيه شعب مصر فيسمع ويرى ويشعر بالفساد ومع ذلك لايحرك ساكنا و(لقد اسمعت لو ناديت حيا ولكن لاحياه لمن تنادى)
2-تعريف الوزراء من هم (مجموعه من رجال المال والاعمال من اقرباء واصدقاء ومعارف واحباب رئيس الجمهوريه ورئيس الوزراء) فهم ليسوا من الشعب الفقير المعدم ولا من اختارهم هذا الشعب بل هم رجال مال لذلك فهم يعملون لصالح رجال المال والمستثمرين والفقراء ليس لهم نصيب من حسابتهم فهم يستعملون موارد الدوله ويستخدمونها افضل استغلال فى اضفاء الوجاهه عليهم ماهى البلد دى هى التركه اللى فاتهالهم ابوهم قبل مايموت ومن امثله هؤلاء الوزراء حاتم الجبلى وزير الصحه الذى انفق ملايين الجنيهات لمواجهه مرض انفلونزا الطيور وفشل وفى عهده ازداد سعر الدواء للضعف وحدثت ايضا فضيحه اكياس الدم الفاسده من شركه هايدلينا لصاحبها هانى سرور عضو مجلس الشعب عن الحزب الوطني ولناتى لمستوى التعليم فى مصر ووضعه صفر فلقد تدنى مستواه وازدادت ظاهره التسرب من المدارس والدروس الخصوصيه التى تكلف المواطنين مبالغ باهظه ولناتى للابهه والعظمه فوزير الاسكان تخدمه ثمانى سيارات منها ثلاثه مرسيدس عيون والناس مش لاقيه شقق تسكن فيها ونظيف حينما كان وزير اتصالات كانت تخدمه12 سياره اما محمود محى الدين وزير الاستثملر لديه اربعه مكاتب عاليه الفخامه فى جاردن سيتى -شارع صلاح سالم هيئه التمويل العقارى-المنطقه الصناعيه (بيحب يغير جو) ولا ننسى ان وضع الاستثمار فى مصر زى الزفت اما بطرس غالى وزير الماليه له ثلاثه مكاتب افخم من سابقه بلاظوغلى مقر الوزاره-مدينه نصر- مصلحه الضرائب ولديه 25 سكرتير وسكرتيره من خريجى الجامعه الامريكيه فقط ( طبعا مش مقتنع بالتعليم المصرى)اما مجموع مصاريف الديكورات والتهانى والتعازى الخاصه بوزراء حكومه نظيف 1.4 مليار جنيه سنويا ومحدش بيتكلم مش بذمتكم ليهم حق

مصر بتتقدم بينا

هاحكي عن موقف بيتكرر كل يوم للمواطن الغلبان اللى اول لما بيصحى من النوم يجرى علشان يلحق الاكشاك اللى بتوزع العيش ويطلع عين اهله فيها وفى الاخر يا يلحق يا ميلحقش ولو لحق يبقى حظه حلو وهيفوز بالغنيمه اللى هيا عيش ملىء بما لذ وطاب من الاتربه وفنون الحشرات التى يتغاضى عنها حتى لايموت جوعا ناهيك عن الذل والاحتقار الذى يشعر به اثناء وقوفه فى الطابور واخيرا عايزين يوزعوه ببطاقه الرقم القومى صحيح مصر بلد الحضارو التقدم صحيح مصر بتتقدم بينا

اسباب انشاء المدونه

بلادي لم تعد بلادي ضاعت مصر وضعنا قررنا ان نعلن عن غضبنا وعدم رضانا مما يحدث قررنا ان نرفع صوتنا ولو قليلا فنحن لسنا عبيدا وبلادنا هى بلادنا وليست بلادهم وخيراتنا هى خيراتنا وليست خيراتهم سنقول لا بصوت عال فلم نعد نخشى ضياع شئ فقد ضاع بالفعل كل شئ